ÌYÀ TÍ MO JẸ NÍ ÌWÓ
Láti ọwọ́ Israel Ayanwuyi

Bí a kò bá r'ẹ́ni fẹ̀yìntì bí ọ̀lẹ làárí. 
Ìyá tí mo jẹ ní Ìwó kọjá àfi ẹnu sọ. Ìròyìn kò tó àmójúbà; ti àsọrégèé kọ́, kì í ṣe tẹnu lásán; díẹ̀ ni mo le rò nínú àlàyé ìṣẹ̀lẹ̀ mọ́nigbàgbé tó sẹ̀ ní ọdún mélòó kan sẹ́yìn.
Ọjọ́ tí ebi bá ń pa ọ̀nà, kí á má rìn lọ́jọ́ náà ni ìwúre tí kóówá máa ń ṣe; ibi ilẹ̀ gbé ń pò ń gbẹ ẹ̀jẹ̀, kí á má rìn dé ibẹ̀ ni kókó ìwúre ọmọ ẹlòmíràn l'ówùrọ̀ bí wọ́n bá ń ṣe ń jí lórí ìbùsùn; bí ẹlòmíràn bá sì rí ìran ìdààmú ṣáájú ọjọ́, wọ́n a fìdí mọ́lẹ́ bí ẹni àárẹ̀ ń ṣe, bẹ́ẹ̀ akáwọ́gbẹ́kùn wọn tó ńwòran kì í ṣe ọ̀lẹ, inú ni wọn ń rò.

Kò sí ẹni tí í gbọ́ ọjọ́ ikú rẹ̀ tí dunnú, kò sí ẹ̀dá tó le gbọ́ àsọtẹ́lẹ̀ ọjọ́ ìyà rẹ̀ tó le wò sùn-ùn kó dá músò, kí Ẹlẹ́dàá má jẹ kí ohun tí ń dùn nínú wa kó di ìbànújẹ́, kí á má di arìndìn tí kò l'ọ́gbọ́n lórí lójijì.

Ǹjẹ́ ẹ jẹ́ mọ̀ pé láti ọjọ́ ìṣẹ̀lẹ̀ náà ni mo ti ma ń pariwo pé ẹ̀sọ̀ pẹ̀lẹ́ láyé gbà; alágẹmọ tí ń yọ́ rìn, ikú ń pá, áńbèlèntè ọ̀pọ̀lọ́ tí ń jan ara rẹ̀ mọ́lẹ̀. Ẹni tó bá gbọ́n ọgbọ́n kọ́gbọ́n, ìyà kí yà ló máa ń jẹ irú wọn.

Ení-ín làáse kátó ṣe èjì. 
Ṣáájú ọjọ́ tí mo ń wí yí ni mo ti gba lẹ́tà kan tí mo tí ń retí láti ilé ìwé gíga tí mò ń wá ìtẹ́wọ́gbà sí fún ẹ̀kọ́-lọ-síwájú-síi. Ìrètí pípẹ́ a mọ́ ọn ṣe ọkàn láàárẹ̀, èmi tí ń mú ọkàn kúrò lórí rẹ̀. Mo ti ń gba ká mú pé ó tún di ọdún tí ń bọ̀ kí n tó gbìyànjú ilé-ẹ̀kọ́ yí lẹ́ẹ̀kan síi, àmọ́ lójijì ni mo rí ìwé gbà láti positi-ọ́ọ́físì pé wọ́n ti ní kí n wá bẹ̀rẹ̀ ì kẹ́kọ̀ọ́ ní wàrà-ń-ṣe-sà ní bẹ̀.

Bí iṣẹ́ kò bá pé ni, ẹnìkan kì í pé iṣẹ́. Mo mú oókan, mo fẹ́ fi kún èjì, kí n gba oko aláwò lọ. 
À tí àkùkọ ọjọ́ kejì ni mo ti jí. Bí ó ti di àfẹ̀mọ́jú, ní jẹ́jẹ́, ní pẹ̀lẹ́-kùsù, láì fi ohun kan bọ ẹnu, ni mo kùrò nílé—ní jẹ́nẹ́sísì ọjọ́ àbámẹ́ta náà. Ọ̀gangan ọ̀nà ni aláké ń sọ, mo gbéra mò ń wá takisí tí ó le gbé mi lọ ibùgbé àǹtí mi tó wà ní Ilé-márùn-ún nílùú Ìwó. Apá lará èjìká ni ìyekan, mo nílò láti lọ bèrè ìrànwọ́ nípa ti owó fún ìrìn-àjò lọ sí ilé-ìwé náà,tó wà Ìbàdàn.

Mo kọ́kọ́ ṣe ìfòró fún wàkàtí kan lé ìṣẹ́jú mẹ́wàá kí n tó rí takisí tí ò ní èrò, tó le gbé èmi nìkan lọ ibi mò ń rè. Nígbà tí mo rí mọ́tò, inú mí dùn, ìrònú àìjẹun tó ti wà lọ́kàn mi tẹ́lẹ̀ sá kúrò ráúráú.
Ní ìwọ̀nba, ọkàn mi balẹ̀ bí a ṣe ń lọ. A kò dúró, à ń tẹ̀ síwájú.

Bí ènìyàn yó bá jẹ ìyà ní Ìwó, kó wà ní Kàdúná, ó di dandan kó wálé.
Èmi kò mọ! 
Ẹgbẹ̀rún kan alápapọ̀ ló wà lọ́wọ́ mi, ṣùgbọ́n ìgbàgbé ṣe mí láti bèrè lọ́wọ́ bàbá òní-takisí yí bí wọ́n bá ní séńgì. Ọkàn mi kò tilẹ̀ sí síbẹ̀ rárá. Ìrònú kí n de ibi mò ń lọ, kí n báwọn sọ ohun mo ní wí, kí owó kó jáde ni gbogbo àfiyèsí mi. N kò tilẹ̀ gbìyànjú láti béèrè, mo ń gbàdúrà kí Bàbá yí ní séńgì ṣùgbọ́n mo tún ni lọ́kàn pé bí wọn ò bá ní, a ó jọ dà á rú fún ara wa ni láì mọ̀ pé èmi gan-an ni yóò fara-kásá.

Bí a ṣe ń lọ ni Bàbá ònímọ́tò yí gbé ẹ̀rọ-ìbánisọ̀rọ̀ wọn lé mi lọ́wọ́, wọ́n ni kí n bá wọn tẹ àtẹ̀jísẹ́ kan ránsẹ́ sí ọmọ wọn àkọ́bí lọ́kùnrin.
Ní kété tí mo bá wọn ṣe èyí tán, mo mú ẹ̀rọ-ìbánisọ̀rọ̀ náà lọ́wọ́ títí tí mo fi sọ. Èmi ti gbàgbé, Bàbá náà kò rántí béèrè mọ́.

Gbàrà tí mo ni kí wọ́n já mi ni mo yọ owó lápò, ló bá di Ẹgbẹ̀rún kan owó náírà. Mo wo ojú Bàbá, Bàbá náà wo ojú mi, ojú wa ṣe mẹ́rin. A fi bí ìgbà tí èèyàn bá ń wo sinimá. Bàbá ònímọ́tò yarí fún mi lórí séńgì Ẹgbẹ̀rún kan owó náírà tí wọn kò ní, wọ́n ní àwọn ṣẹ̀ṣẹ̀ kúrò ní ilé ni. Wọ́n ní kín n rìnsó ká lọ wáa fọ́ sí wẹ́wẹ́ ní àyíká wa.

Kí Ọlọ́run májẹ kí á rí ogun adánidúró lóòrọ̀kùtù ni kìkì ọ̀rọ̀ tí Bàbá yí rán mọ́nu.

A ti gbìyànjú díẹ̀, ṣùgbọ́n kò jásí ohun kan. Àyíká kò tilẹ̀ tíì kún nítorí ilẹ̀ ṣẹ̀ṣẹ̀ mọ́ ni. Ìfòró pọ̀.

Nígbà tó yá, mo tọrọ gááfárà láti ṣe ẹ̀yọ́ láàrín ìṣẹ́jú kan. Mo fún Bàbá l'ówó kí wọ́n dúró dè mí, mo wọ kọ̀rọ̀-kọ́ńdú kan lọ.

Mo ṣe díẹ̀ níbẹ̀ nítorí ìfòró náà tún jí ti ebi tó ń pamí tẹ́lẹ̀. Bí mo ṣe ṣetán, tí mo jáde, mo wá Bàbá ònímọ́tò tì. Eré ni mo pèé, ó di òtítọ́ mọ́ mi lọ́wọ́.

"Èèmọ̀ rè o!" Mo pariwo. Àfi bí ìgbà tí èèyàn bá ń lálàá.
Ìbánújẹ́ mu mí lómi, ara mí tutù wọ̀!

Gbogbo àgbọ́kànlé mi náà ni owó yìí, ìrètí tí mo tún ní ni bí mo bá de ibi mò ńlọ láti gbà síi fún ìrìn-àjò pọndandan tí mo fẹ́ lọ.

Ìdóró gba ìkòkò ni ìdóró gba idẹ. 
Orí ìnàrò náà ni mo wà tí mo fi rántí ẹ̀rọ-ìbánisọ̀rọ̀ Bàbá yí tí ń bẹ lápò mi.
"Mo rántí. Mo ti rántí!" Lorin tuntun tí mo mú banu. Mo tilẹ̀ gbàgbé pé òpópónà ni mo wà.
Oró àkọ́dá kò le dàbí àdágbẹ̀yìn, mo ṣe bí ọwọ́ mi ti mókè.

Bí a bá ń wá owó lọ, tí a sì rìn pàdé iyì lọ́nà, ó yẹ ká padà lọ ilé dàìrẹ́tì ni.

Kódà, mo dá-wọ̀ọ́-ìdùnnú pé owó de, bí mo bá le rí ẹni ra ẹ̀rọ yí, n kò nílò láti wojú àǹtí mi fún ìrànwọ́ owó kankan mọ́ lórí ìrìn-àjò náà. Bí a bá ní eégún baba ẹni yóò jó, bí a bá ní kò sì ní jó mọ́, kò sí bàbá-ńlá ẹni tí í mú ni síi. N ò gbìyànjú láti pe ẹni tí ó súnmọ́ Bàbá yí rárá. Ní ṣe ni mo lu ẹ̀rọ ìbánisọ̀rọ̀ náà pa.

Ohun tó ṣeé faga, là ńfaga sí; èwo ní, Ìwòyí àná mo ti na àna mi fága-fàga?
Èmi alára gan kò ní ẹ̀rọ-ìbánisọ̀rọ̀, ṣùgbọ́n n ò bèsùbẹ̀gbà, mo fònà títì iwájú mi—N ò wulẹ̀ tẹ̀ síwájú láti dé ilé àwọn àǹtí mi mọ́ lọ́jọ́ yí. N ò ronú pé mo ti dé òpópónà ilé wọn, mo mórí padà, ọpọlọ mi bẹ̀rẹ̀ sí ní ṣiṣẹ́ bí ago, ọ̀nà à ti ta ẹ̀rọ yí ni mo ń sánnà.

Ṣe bí wọ́n ní kí á dàálẹ̀, ká tún sà kì í ṣe fáàrí tí ònígaàrí le se ni. Ọ̀rọ̀ tèmi kò gba bẹ́ẹ̀, mo bẹ̀rẹ̀ ìrìn àjò ibùsọ̀ mẹ́wàá mìíràn. Mò ń wá ẹni tí ó le ra ẹ̀rọ-ìbánisọ̀rọ̀ náà.

Kí Èdùmàrè má jẹ́kí á sọnù kí á tó sọnú.
Gbogbo àsìkò yí, ebi tún ti sá kúrò. Mo tẹ̀ ṣíwájú ìrìn mi lọ sí ibi kan tí mò tí ma ń gbọ́ tẹ́lẹ̀ pé wọ́n ti máa ń ra àti tà ẹ̀rọ-ìbánisọ̀rọ̀ àlòkù.
Mo ti fẹ́rẹ̀ẹ́ dé ibi tí mò ń lọ tí òjò fi sú, bí-eré-bí-eré, ọwọ́ òjò náà bo lẹ̀. Èmi tilẹ̀ ń ṣe eré àwọn ọmọdé, mo ní "Òjò mọ́ lọ, atẹ́gùn mọ́ ọn fẹ́"

Omi kín-ń-kín làá r'ẹ́lá sí, òjò bẹ̀rẹ̀, mo sá fún òjò kí n mọ́ tún jẹ ìyà míì lọ́wọ́ òjò àti láti dáàbò bo ẹ̀rọ náà. 

Òjò náà rọ̀, ó fẹ́rẹ̀ wú òkú ọ̀lẹ.
Mo dúró-dúró, àfi ìgbà tí òjò náà dáwọ́ tán pátápátá. Mo tẹ̀ síwájú, mo pàpà dé ibẹ̀. Olè ní mọ ẹsẹ̀ olé tọ̀ lórí àpáta, èmi ò tilẹ̀ mọ pé ó ní èdè ìbánisọ̀rọ̀ kan tó wà láàrin àwọn ènìyàn tó ń ta ohun kan fún ara wọn níbẹ̀.
N ò tí sọ̀rọ̀ púpọ̀, mo kàn fi ọjà hàn wọ́n lásán ni, a ò tíì bẹ̀rẹ̀ ìdúnàá-dúrà tí wọn fi dá mi mọ̀ pé èmi kì í ṣe ara wọn.

Ọgbọ́n ju ọgbọ́n lọ, ọ̀gá wà lóòótọ́. 
Ọ̀kan nínú wọn gba ẹ̀rọ yí, ó ní òun ń bọ̀ wá, òun kàn fẹ́ fi han ẹniti owó ń bẹ lọ́wọ́ rẹ̀. Láàrin ìṣẹ́jú béléńjà, n kò rí ẹni yí mọ. Mo dúró ṣáà, ń kò gbúro ẹnìkan.

Lẹ́yìn wákàtí kan, mo béèrè arákùnrin náà lọ́wọ́ àwọn ènìyàn tó kù tí wọn ń bá iṣẹ́ tiwọn lọ, wọn ní kí n dúró. Bí wọ́n ṣe fi ọgbọ́n àrékérékè yí tàn mí tó fi di agogo márùn-ún ìrọ̀lẹ́ nìyí.

Mo wá pinnu láti ṣe bí ọkùnrin, mo yarí fún wọn. Ṣùgbọ́n kí n tó wí kí n tó fọ̀, ìgbájú ìgbámú ni wọ́n fi dá mi lóhùn, wọ́n ní ṣe àwọn ni àwọn gba ẹ̀rọ-ìbánisọ̀rọ̀ yí lọ́wọ́ mi ni, kín n má wá ẹni náà lọ.

N ò kúkú le dá wọn mú, agídí ọkàn-àyà mi pẹ̀lú wọn ló tún kó ìyà jẹ mi púpọ̀. A jọ ń fà á pé ṣe bí ara wọn ni ẹni náà. Àwọn kò tilẹ̀ fi ọ̀rọ̀ dá mi lóhùn mọ́ nígbà tí wọ́n ti rí pé n ò ní gbọ́, ìyà ni àwọn mẹ́ta náà fi dá mi lóhùn, wọn tún pè mí ní olè.

Kódà, ilé mi kọ́ ni mo sùn lọ́jọ́ náà. Iwájú kò sé lọ, ẹ̀yìn kò sé padà sí, ìta ni mo sùn. À ṣé ìlàkàkà mi lórí asán, ọwọ́ àwọn ọ̀daràn míràn ni mo lọ kó sí.

Ọ̀kánjúà, olè, ọ̀lẹ àti àìhùwà-bí-ọlọ́run jẹ́kí n pàdánù ọdún kan fún Ẹ̀kọ́ mi, ó mú mi jẹ ìyà bí ọ̀daràn, ó mú mi sùn ní ìta láìṣe ọdẹ, ó mú mi kọ́gbọ́n lọ́nà tí kò rọrùn àti ọ̀nà ìtìjú. Ẹkún àti ìpayínkeke ní ọ̀gànjọ́ òru ọjọ́ pọ̀, tí mo si fẹ́ẹ̀ le fi ọjọ́ tí abími bú. Gbogbo ẹ̀, àfi ọwọ́ fà mi náà ni. Kò sí àwíjàre kan fún oníwà-kíwà.

Kí Olódùmarè ràn wá lọ́wọ́ ni gbogbo ìgbà, ká má fi ọwọ́ ara wa ṣe ara wa. (Àṣẹ).

Ṣíṣe Ìgbéga Àwọn Ogún Dáradára Yorùbá Ló Jẹ Wá Lógún 
AIFMEDIA || YÒRÙBÁDÙNL'ÉDÈ
© Copyright, Israel Ayanwuyi, 2020 

ÀRÒGÚN: ÀWÍJÀRE

Láti ọwọ́ Israel Ayanwuyi  

Bí a bá ń sọ̀rọ̀ nípa ọjọ́ iwájú orílẹ̀-èdè kan tàbí ìrètí ọjọ́ ọ̀la tó dára àgbáyé, ọ̀rọ̀ àwọn ọmọdé ló yẹ ká kọ́kọ́ mú gbọ́, nítorí ení là á ṣe kátó ṣ'èjì ló dífá fún àpọ́n tí ń fi ojoojúmọ́ ṣe ìdárò ọmọ—Ẹni tó bá máa bímọ, ọ̀rọ̀ ìyàwó ló yẹ kó kọ́kọ́ mú gbọ́.

Láti inú ìdílé ni ọmọ tí ń wá, ìdí nìyí tí gbogbo ẹni tó ń gbèrò à ti ní ìdílé pẹ̀lú àwọn tó ní ìdílé lọ́wọ́ báyìí fi gbọ́dọ̀ sa gbogbo ipá wọn gẹ́gẹ́ bí Ọlọ́run yó ṣe fi ore-ọ̀fẹ́ fún wọn láti jẹ́ òbí tó kún ójú òṣùwọ̀n.

Ọ̀rọ̀ ìyàwó tàbí ọkọ níní kì í kàn ṣe ti ọjọ́ orí, àgbà kò kọgbọ́n; kì í ṣe mo ti n'íṣẹ́ lápá tàbí owó lọ́wọ́, owó lásán kọ́ni wọ́n fí t'ọ́mọ yanjú; kì í ṣe mo ti parí ilé-ìwé, iṣẹ́ ni ìdílé, kì í ṣe yàrá ì fi sàtífíkétì ilé-ìwé yangàn. 

Ǹ jẹ́ mo ti ṣetán àti ní sùúrù; nífẹ̀ẹ́ àìlódiwọ̀n sí ẹnìkejì mi; darí àwọn ènìyàn mi nínú ìfẹ́ lójú ìpènijà; lọ́ ìdílé mi sórí àpáta kí ìjì, ìkún-omi tàbí ìpọ́njú ńlá ayé má ba à gbé lọ? Ìbéèrè pàtàkì wọ̀nyí àti àwọn míràn ló yẹ kó o bi ara rẹ kí o tó gbé ìyàwó tàbí lọ́kọ. Àìní òye bí ìdílé ṣe ń ṣiṣẹ́ ló máa ń padà fàbọ̀ s'órí àwọn ọmọ nítorí kòní sí ìtọ́ni tó gbọn-n-gbọ́n fún wọn. 

Bí a bá wo ọ̀rọ̀ yí dáadáa, ọ̀rọ̀ tó fa kíki ni. Ṣé ti ìṣekú pa ara ẹni tó ń jà rà-ìn-rà-ìn kárí ọ̀pọ̀ àwùjọ ni káwí ni tàbí ti ìwà ìbàjẹ́ tí ń fi ìgbà-dé-gbà peléke l'órílẹ̀-èdè àgbáyé? Kàkà kí ewé àgbọn dẹ̀, ní se ló ń gbogbò sí i. Ìbànújẹ́ wá dórí àgbà kodò, bẹ́ẹ̀ wọ́n ni àgbà kì í wà lọ́jà k'órí ọmọ tuntun wọ́. Orí ọmọ tuntun ti ìran ìkẹyìn ń wọ́ lọ báì—Ọ̀pẹ̀rẹ̀kẹ́tẹ̀ rẹ̀ ń dàgbà, inú adámọ̀ rẹ̀ sì ń bàjẹ́.

Lọ́jọ́ ọjọ́sí ọmọdé kì í gbójú sókè wo àgbà, bí (àwọn) àgbà bá ń sọ̀rọ̀, àwọn ọmọdé ma ń pa lọ́lọ́ ni ṣùgbọ́n ní ìṣẹ̀yín-ín ohun gbogbo ló ti yí padà. Ìdí tí mo ṣe mú àrògún àsínilétí yìí wá gan ni kí gbogbo wa ó ṣe akitiyan à ti wá ìlọsíwájú òhun ìdàgbàsókè tó mọ́yán lórí fún àwọn ògo wẹ́wẹ́ wa. 

Ẹ̀kọ́ ilé gbogbo àti ti bí a ṣe ń gbélé ayé ní gúnmọ́, ìlanilọ́yẹ̀ tó yanjú pẹ̀lú ọ̀rọ̀ ìtùnú pé ọjọ́ ọ̀la yóò dára ṣe kókó fún wọn nítorí ọjọ́ ọ̀la kàn kò sí tí a bá tí kó ilà àwọn ọmọ wọ̀nyí kúrò lékọ. Ẹ jẹ́ k'ápawọ́pọ́ pèsè ìrètí-ayọ̀, ìdílé tó ń fi ni lọ́kàn balẹ̀ àti fi ìfẹ́ tó jinlẹ̀ hàn kí ìbànújẹ́ má baà á ráyè débi pé èrò à ti hùwà burúkú àbí pokùnso yò jinlẹ̀ lọ́kàn onírúurú wọn. 

Ohun tí ẹyẹ bájẹ ni yóò gbé fò: Ọ̀rọ̀ ìyè àti ìrètí ṣe kókó. Ẹ má jẹ́ kí á fi ọ̀rọ̀ ẹnu wa ba ẹnikẹ́ni nínú jẹ́ nítorí ìgbà kan ò lọ bí ò réré, ilé ayé kò tẹ́ lọ bí ọ̀pá ìbọn; ọba mẹ́wàá, ìgbà mẹ́wàá lọ̀rọ̀ ilé ayé.

Àgbà kò sí nílùú ìlú bàjẹ́, baálé ilé kú ilé dahoro. A kì í torí àwíjàre kí'tọ́ ó tán lẹ́nu; bẹ́ẹ̀ni, ọ̀rọ̀ ṣókí ti tó fún àgbà tó l'ọ́gbọ́n lórí. Ẹtún ìlú tò ọjọ́ ń lọ. ̀

Àgbà wa kò ní dàgbà ìyà, ẹnu wa yó sì tó ọ̀rọ̀ láwùjọ láṣẹ Adédàá. (Àṣẹ).

Ṣíṣe Ìgbéga Ogún Dáradára Yorùbá Ló Jẹ Wá Lógún 

AIF MEDIA | YÒRÙBÁ DÙN LÉDÈ

26052019

© Israel Ayanwuyi, 2019 

ÌTÀN: ÌBÀNÚJẸ́ ỌJỌ́ KAN

Láti ọwọ́ Israel Ayanwuyi 

Lọ́gán tí mo rí ìmọ́lẹ́ ọjọ́ ajé, mo gbéra nílẹ̀, mo kí Olódùmarè kú òwúrọ̀ nítorí pé Òun náà ni Ọba àjìkí, Òun tún ni Ọba àjígẹ̀. Kò pẹ̀ẹ́ kò jìnnà ni mo gbọ́ tí Bàbá lókè ń dá mi lóhùn pé, "A ò jíire bí?"

Nígbà tí Òrìṣà-Òkè ti dáhùn, mo tẹ̀síwájú láti kí ará ilé mi lápapọ̀. A dúpẹ́ tí Èlédùmarè jí wa lọ́kọ̀ọ̀kan, tí a ò ti ojú orun bọ́ sí ojú ikú, àlákálàá náà kò sẹ̀rù bà wá lójú ìran. 

Èmi wọ balùwẹ̀ léṣẹ̀ kan náà, mo múra, mo gbé gbogbo ẹrù mi láti máa lọ ìdí-kọ̀. Gbogbo ará ilé bá ń fi igbe ìpàrọwà ta fún mi láti mọ ọmọ ẹni tí mò-ń-ṣe. Wọn kò fẹ́ kí nlọ, kódà wọ́n banújẹ́ láti wí fún mi pé ó dìgbà ó ṣe. Gẹ́gẹ́ bí ẹ ṣe mọ: Bí ará ilé ẹni kò bá ṣ'ènìyàn rárá, a ò le fi wé aláròó lásán. 

Mo wà nílé fún ọjọ́ mẹ́fà tó parí oṣù tó gbẹ̀yìn ọdún àti ọjọ́ mẹ́jì àkọ́kọ́ tó bẹ̀rẹ̀ ọdún titun tó tẹ̀lé. Àjọyọ̀ ìparí àti ìbẹ̀rẹ̀ ọdún ní ṣókí ni mo wá bá wọn ṣe nígbà tí wọ́n kúkú fún mi ní họlidé ọjọ́ mélòó kan ni ibi iṣẹ́. 

Ó pọndandan fún mi láti padà sí ẹnu iṣẹ́ ní òwúrọ̀ ọjọ́ kẹẹ̀ta (èyí ni ọjọ́ kẹẹ̀ta oṣù kínni ọdún tí a tún mọ̀ sí oṣù Sẹẹrẹ) gẹ́gẹ́ bí òfin àti ìlànà ilé-iṣẹ́ tí mò ń bá ṣiṣẹ́, n ò le kọ̀ láti mọ́ lọ à fi bí mo bá ti rí iṣẹ́ sí ibòmíràn. 

Mo gùnlẹ̀ sí ìdí-kọ̀ àwọn ọlọ́kọ̀ èrò lẹ́yìn ìṣẹ́jú mẹ́wàá sáńgílíńtí, Elédùmarè ṣàánú mi, àwọn èrò kún sínú bọ́ọ̀sì náà lẹ́yìn wákàtí kan. (Èmi gbà pé wákàtí kan yí kò tí ì pọ̀ jù nítorí àgbègbè ibi tí mo ti wá: à ti rí èrò ìlú tí mò ń lọ kò rọrùn).

Ni a bá gbéra, a mórí lé ìlú Kaduna. Nígbà tí n ó fi dé ìlú ńlá, ilẹ̀ ọjọ́ yí ti sú pátápátá ní torí àìjára mọ́rín dírẹ́bà awakọ̀ yìí. Agogo mẹsan-àbọ̀-dín-ní-ìṣẹ́jú-mẹ́ta ni wọ́n já mi ní bọ́sí-sitọpù tó gbẹ́yìn.

Mo dá òní-kabúkabú dúró ní ọwọ́ iwájú. Ó gbé mi tòhun ti ẹrù, ó já mi níwájú ilé tí mò ń gbé gan-an.

Bí mo ṣe yanjú òní-kabúkabú tán ni mo ti bẹ̀rẹ̀ sí níí gbá gétì ilé tí mò ń gbé ṣùgbọ́n n ò gbọ́ ìjẹ́ ẹnìkan. 

N ò tilẹ̀ ní iná kankan lórí ẹ̀rọ-ìbánísọ̀rọ̀ mi kín n tó gbéra ní òwúrọ̀ ọjọ́ yí gan-an, n ò le pe ẹnikẹ́ni láti inú ilé fún ìrànwọ́ pẹ̀lú ṣíṣí gétì. A rí wo àwọn tó tún tan ẹ̀rọ-amúnáwá nínú ọgbà gan-an kò le jẹ́kí ọkùnrin asọ́gbà gbọ́ ohùn tó wù kó jáde láti ọ̀dọ̀ tèmi ní ìta. 

Iná ò gbọ́dọ̀ kú, omi ò gbọ́dọ̀ jò dànù, ìrònú di méjì fún abomi s'ẹ́nu fẹ́ná mi.

N ò kọ́kọ́ gbàgbọ́ tàbí rò ó pé mo le sùn ní ìta. Pé mo tiẹ̀ gúnlẹ̀ láyọ̀, tí n ó sì le wọ iṣẹ́ padà ní òórọ̀ ọjọ́ kejì, ògo ni fún Adẹ́dàá. 

Gbogbo ìrònú mi wá tún ń lọ pé, ó ṣeéṣe kí wọn pa ẹ̀rọ-amúnáwá jẹnẹrétọ̀ náà láì pẹ́ ṣùgbọ́n wọn kò ṣe bẹ́ẹ̀ láàrin wákàtí-kan-lé ìṣẹ́jú díẹ̀ tí mo ti ń dúró. Mo wá ronú jinlẹ̀, mo wòye pé àtànmọ́jú gbáko ni wọ́n fẹ́ lo ẹ̀rọ-amúnáwá náà. 

Adágún odò tàbí àbàtà ni alákàn ń wẹ̀

Kò sí ṣíṣe kò sí àìṣe, mo tẹ́ aṣọ ìró kan nínú ẹrù mi sílẹ̀, mo sùn ní ẹ̀gbẹ́ kan gétì. Èyí jẹ́ ìgbà àkókò tí n ó sùn ní ìta gbangba. Bótilẹ̀jẹ́pé inú ìfòyà ńlá àti àfonífojì ni mo wà, gẹ́gẹ́ bí obìnrin, ọ̀pọ̀lọpọ̀ ewu ló tún wà nínú ìgbéṣẹ̀ mi yìí. N ò sì sùn wọra títí di àfẹ̀mọ́jú ọjọ́ kejì.

Ara ríro àti orí fífọ́ látàrí ìrìnàjò tí mo rìn gan kò tún jẹ́ kí n gbádùn. 

Ọjọ́ yìí gan ni mo mọyì àwọn tí ogun sí ní ipò padà, àwọn ọmọ aláìní ìyá àti bàbá, àwọn aláìní ilé lórí, àwọn tí ojú ń pọ̀n àti àwọn tí ẹbí tàbí ará ti kọ̀tì. Mo banújẹ́ púpọ̀, orí ló yọ mi tí n ò lùgbàdì ewu òru. 

Ìròyìn kò tó àmójúbà, ṣùgbọ́n bí ẹ bá rí ẹni ojú ń pọ́n, ẹ rànwọ́nlọ́wọ́, ẹ nawọ́ àlàáfíà àti ìtọ́jú tó wà ní ìkáwọ́ yín sí wọn. 

Èdùmàrè kòní sọ ẹnìkẹ́ni nínú wa tàbí nínú àwọn ènìyàn wa di aláìní. Ọlọ́run Olódùmarè yóò sì ṣàánú àwọn aláìní nínú ọrọ̀ Rẹ̀ kíkún àti ọlá ńlá. Àṣẹ.

Ṣíṣe Ìgbéga Ogún Dáradára Yorùbá Ló Jẹ Wá Lógún 

AIF MEDIA | YÒRÙBÁ DÙN LÉDÈ

01022019

© Copyright, Israel Ayanwuyi, 2019